பிகில் படத்தைத் தொடர்ந்து விஜய், லோகேஷ் கனகராஜ் இயக்கும் படத்தில் நடித்துக் கொண்டிருக்கிறார்.தளபதி 64 என அழைக்கப்படும் இப்ப்டத்தில், விஜய்யுடன், விஜய் சேதுபதி, மாளவிகா மோகனன், சாந்தனு, ஆண்ட்ரியா உள்ளிட்ட பலர் நடித்து வருகிறார்கள்.
தனது முதல் படமான 'மாநகரம்' படத்திலேயே விமர்சன ரீதியாக பெரும் வரவேற்பைப் பெற்றார் லோகேஷ். அடுத்ததாக அவர் இயக்கிய 'கைதி' தீபாவளியன்று, 'பிகில்' திரைப்படத்துடன் வெளியானது. இப்படம் விமர்சன ரீதியாகவும், வசூல் ரீதியாகவும் ரசிகர்களிடம் நல்ல வரவேற்பைப் பெற்று வருகிறது.
இந்நிலையில் இதற்கடுத்த படமான 'தளபதி 65' படத்தை யார் இயக்குவார்கள் என்ற எதிர்பார்ப்பு, ரசிகர்களிடம் அதிகமானது. மீண்டும் ஏ.ஆர்.முருகதாஸ் அல்லது அட்லீ இயக்குவதற்கான வாய்ப்புகள் இருப்பதாகவும் கூறப்பட்டது. இந்நிலையில், விஜய்யின் 65-வது திரைப்படத்தை இயக்குநர் மகிழ் திருமேனி இயக்கவிருப்பதாக முன்னணி நாளிதழ் ஒன்றில் செய்தி வெளியிடப்பட்டுள்ளது.இவ்வாண்டு வெளியான மகிழ் திருமேனியின் 'தடம்' ரசிகர்களை வெகுவாக கவர்ந்தது. இதற்கிடையே அக்டோபர் மாதம் தளபதி 64 ஷூட்டிங் பிரேக்கில், மகிழ் திருமேனியிடம் விஜய் கதை கேட்டதாகவும், கேட்டு முடித்த விஜய் இம்ப்ரெஸ் ஆகிவிட்டதாகவும் அந்த செய்தியில் குறிப்பிடப்பட்டுள்ளது.
விஜய் தற்போது நடித்து வரும் 'தளபதி 64' படம் ஏப்ரல் மாதம் வெளியாக இருக்கிறது. 65 ஆவது படத்தின் படப்பிடிப்பு ஜூன் மாதம் தொடங்கும் என்றும் கூறப்படுகிறது.உறுதிப்படுத்தப்படாத இச்செய்தி வேகமாகப் பரவிவருகிறது.